政情：陳鑑光 劉伯智 攜手圓後生仔機師夢
早前喺一個活動上見到仁愛堂總理陳鑑光同香港青年航空學會（學會）主席劉伯智，記得陳鑑光曾經認真學揸飛機，唔知考到牌未呢？佢笑笑口話仲未，事關好忙，最近就忙喺下月初舉行一場慈善音樂會幫學會籌款，佢又話自己年紀唔細，考唔考到機師牌冇所謂，幫後生仔完成飛行夢想緊要啲喎。
培訓專才 學費平到笑
劉伯智話學會係由一班現職機師同專業人士喺四年前發起成立，目的係培育本地航空專才，四年來共培訓二百幾位學生，當中六十幾位已係民航機師，成績唔錯。佢仲話係提供全年課程，唔係雞精班，都只係收取八百五十二元，因為香港嘅國際電話區號字頭係「八五二」。相較於外面私人培訓機構每堂一千幾蚊嘅學費，其實等於免費。
陳鑑光就話學會唔止教足一年航空知識，仲會送學員去外國實地飛行，使費好大，所以佢一定要支持呢班熱心機師，就算自己唔得閒考牌都無所謂喇！