政情：冧友後逃亡「麟」為退會王
今屆立法會一開始，由於民主派、本土派同建制派就十八個事務委員會正副主席嘅分配談判破裂，要「冧友」加入委員會爭奪正副主席，搞到每個議員閒閒哋都加入十幾個委員會。大戰過後，委員會隨即出現退會潮，民主派同建制派都有個別議員去信要求退出委員會，衞生服務界李國麟日前更一口氣退咗十二個事務委員會，預計會成為今屆「退會王」，睇嚟委員會大逃亡仲會持續。
身兼衞生事務委員會主席嘅李國麟之前喺「冧友」嘅時候，一共加入咗十八個委員會。佢尋日連發十二封信，分別要求退出工商、福利、保安、人力、財經、發展、公務員及資助機構員工、司法及法律事務、教育、資訊科技廣播事務、經濟發展及交通事務委員會，就連人事編制小組委員會同工務小組委員會都退埋。佢喺信中以調整工作安排為由申請退會，全部都獲得相關委員會主席接納，退出十二個委員會嘅佢成為今屆嘅「退會王」。
建制派議員同減磅
除咗民主派之外，建制派議員都陸續退出唔同委員會。本身係財委會主席嘅保險界議員陳健波就「減磅」，退出民政、交通事務委員會；身兼政府帳目委員會主席嘅地產及建造界石禮謙亦退咗環境、食物安全及環境衞生事務委員會；議會「新丁」、工業界（二）吳永嘉就以公務甚為繁忙為由，退出咗交通、食物安全及環境衞生事務委員會，鄉議局嘅劉業強退出教育事務委員會；民建聯區議會（第一）嘅劉國勳退出資訊科技及廣播事務委員會，而田北辰同陳恒鑌就分別退出工商事務委員會。合計都有七個建制派同一時間「減磅」，相信退會潮將會繼續。
助減輕秘書處工作
雖然話，出出入入委員會好似唔係太好，但有人話議員若要兼顧十幾個委員會根本分身不暇，同時令秘書處難以為議員夾時間開會，其實對各方面都無乜好處，成件事根本係一個僵局，不能化解。依家班議員陸續減磅，相信可以回復正常喇！