中環出更：「走狗漢奸黎」鎖頸遊街示眾
反壹傳媒黎智英（漢奸黎）嘅行動升級，十八名聲稱自發嘅人士尋日拉起印有「聲討禍港漢奸黎智英」嘅橫額，並且帶同戴上鎖鏈嘅漢奸黎紙板人遊街，踩上漢奸黎嘅寓所外示威，怒吼踢走「走狗」漢奸黎。
該批示威者喺尋日早上約十時四十五分，拉起橫額並高舉穿黑衫、戴紅色領呔嘅紙板人，用鎖鏈將紙板人的頸及手鎖上，紙板人上貼有「打倒肥佬黎」嘅標語，遊行到漢奸黎位於何文田嘅寓所外，有示威者更攜帶氣球及酒，直斥漢奸黎係「走狗」。
示威者狠斥無恥禍港
行到漢奸黎嘅寓所外後，示威者再拉起橫額及手持印有「報導（道）不實 矇（蒙）騙市民」、「肥黎系（係）走狗 快快踢佢走」及「無恥壹傳媒 日日呃市民」等標語，又展示「聲討禍港 漢奸黎智英」橫額，並高呼口號要踢走「走狗」漢奸黎。示威者大約逗留兩小時後和平散去，及至下晝二時五十分，示威人士再折返並大叫口號，到下晝約四時四十五分離開。
近期針對漢奸黎嘅示威行動不絕，自六月十日起計，至今已踏入一百五十三日，連同尋日嘅行動在內，到漢奸黎寓所外及將軍澳壹傳媒大樓外示威嘅行動最少達八十一次，當中自稱霸王國際集團員工及苦主佔十次、正義聯盟佔三次，旅遊業界及其他人士則有六十八次。
卓妮