古時候皇帝進膳前，太監會先用銀筷子試吓有冇毒，辦法係就係土咗啲，但又的確幾有效，估唔到今時今日香港科技進步，食安問題反而長爆長有，唔通港產食安官僚連太監都不如？
呢，好似江蘇大閘蟹驗出含致癌物二噁英呢單嘢咁吖，食安中心九月抽查市面大閘蟹，足足搞成兩個月至公布結果，市民都唔知食咗幾多落肚。把關不力已經夠離譜，連問題大閘蟹流出市面嘅數量以至問題蟹養殖場所，當局至今仍一頭霧水，市民真係多得佢哋唔少。
致癌蟹攻陷本港，市民固然有得震冇得瞓，涉事蟹商大批貨砸住喺度，其中一半已經死咗，大拿拿唔見幾十萬，名副其實做咗「大閘蟹」，同樣係一殼眼淚。根據蟹商嘅講法，行內多年以來爭取由本地進口商一併處理出口，自行監管質素，而唔係好似依家咁，要經由其他已註冊養殖場辦理出口文件，點知當局一直借咗聾耳陳隻耳，直頭係「冇神經」兼「冇知識」咁話。亦有蟹商曾經打算向食環署解釋，並唔係從問題養殖場取貨，結果被對方一口拒絕。
冇錯，食物安全人命關天，小心一啲無可厚非，但如果今日牛肉出事，有理冇理全面停賣牛肉，聽日雞肉出事，全香港又即係冇雞食，咁簡單嘅工作，牛頭角順嫂都識喇，使鬼你班高薪厚祿嘅官老爺做咩。你話官員落力把關都算嘞，實情係大閘蟹只要獲內地發出「衞生證明書」就可供港，至於檢驗咩嘢項目以至追查飼養大閘蟹嘅產地喺邊，全部都旨意晒內地，香港淨係負責喺關口同市場抽驗，咁搞法唔出事至奇。官老爺自己做唔到嘢，又唔畀業界自己做，結果依家出咗事，市民健康隨時受損，業界亦係雞毛鴨血，你話係咪累人累物累街坊吖。
話時話，類似事件都唔係第一次發生咯。早排哮喘豬流入市面，搞到人心惶惶，當局明明check到有問題都可以放行，仲要差唔多賣足成日至施施然封存，之後更加殺錯良民，好多身家清白嘅零售商被點錯相，結果咪搞到道歉賠償收場囉。
講開港產食安官僚累街坊，真係一匹布咁長。年前台灣爆發坑渠油風波，到最後發現香港竟然係源頭之一；又試過有一次澳門市面出售嘅煙三文魚柳驗出被李斯特菌污染，結果原來又係喺香港加工，你話係咪靠害吖！
計功夫茶話齋，想市民食得安心，始終都係要效法古人。漢代規定市面有人賣腐肉，官員唔依法銷毀都要連坐處分。不過如果食安官僚唔捨得份筍工咯喎，功夫茶唔爭在畀多個選擇你哋，自己啃晒啲問題食品佢啦！