兩隻無知無恥小學雞，日前強闖立法會「自我宣誓就職成功」。老天啊！老朽是在看《飛越瘋人院》嗎？之不過，呢部電影嘅主角係因為厭惡監獄裏嘅強制勞動，才佯裝精神異常而被送進精神病院。如今，兩隻不知所謂嘅小學雞，在一些不知所謂嘅非建制派議員護送下，生動的演出了一幕幕丟人現眼嘅「真傻鬥白癡」！
一班非建制派議員尤其是長毛、陳志全、毛孟靜，每次都落力保護兩隻人人喊打嘅過街老鼠，喂，你哋唔係幫緊佢哋，而係令佢哋出醜無底線啊！游蕙禎成條飛魚咁撲向主席枱前，自己帶咪口噏噏如律令對住張紙自言自語，咁就當自己完成宣誓，咁都得？老朽當年若然自己狂呼「我願意」就可以抱得夢中情人歸，咁就毋須抱憾至今啦，你話係唔係搞笑到笑死全地球嘅曱甴？如此鬧劇，係香港立法會先至有得睇咋！呢班議員就像爛醉如泥嘅人，永遠迷迷糊糊地嘀咕：我冇醉！嘔到一地都係仲話：乜食剩咁多好嘢啊！
嗰個最鍾意倒果為因嘅「頭仲痕」，無知無恥無賴到趕極都唔肯離開會議廳，有網民就話：傻仔，入世未深就學人玩政治，知唔知自己畀政治玩緊？老朽認為佢肯定唔知，佢每次噏嘢都詞窮理屈卻要扮晒正義咁款。各位，你話啲咁嘅小學雞如何懂得「議政」，香港嘅將來交畀呢啲小學雞，唔使阿爺「直接管治香港」，唔使講乜嘢「一國兩制名存實亡」，香港好快就會玩完。香港有啲咁嘅活寶小學雞，加上一班不知所謂嘅非建制派搞事議員，成事不足，敗事有餘，令議會烏煙瘴氣，社會內耗不斷，仲有乜嘢希望？
唔好忘記，納稅人養你班「尊貴議員」，立法會每年開支逾七億元，你哋嘅薪酬同營運開支約佔三成，即係逾二億一千萬元，這筆錢花喺你哋身上，市民卻只看到一幕幕鬧劇，你話唔心噏就勢係假！