做咗衞生防護中心總監四年嘅梁挺雄，下周二就會展開退休前休假，職位將由衞生防護中心特別預防計劃顧問醫生黃加慶接任。梁挺雄係第一個約滿離任嘅總監，事關前兩任總監梁栢賢及曾浩輝分別調職及辭職。
唔知係咪退休高官到商界搵真銀嘅負面消息太多，梁挺雄一開口就強調，退休後唔會加入私營商業機構，稍後會集中教學同科研，透露應該會去大學教書。有傳聞話，曾經做過衞生署中醫藥助理署長嘅梁挺雄，退休後會加入一間大學嘅中醫學院，仲位高權重添！
梁挺雄係首位任滿退休嘅防護中心總監，食物及衞生局局長高永文尋日都特別向梁致謝，希望佢退休後都前程錦繡。梁挺雄就話，加入衞生署三十幾年，好唔捨得同事喎！
至於接任嘅黃加慶現時專責愛滋病工作，除負責每季公布最新嘅愛滋病數據，亦參與診症同研究。
除咗梁挺雄退休之外，短期內都仲有唔少管理層陸續退休，包括衞生署出身嘅食物安全專員譚麗芬。
