政情：貝鈞奇 王國潼音樂「療傷」
人生難免遇上挫折，走出困局嘅方法各適其適，香港足球總會副主席貝鈞奇及國寶級「二胡大師」王國潼，就鍾意用聽音樂、睇球賽方式去忘記不快往事。
去年遭遇電話騙案而損失逾兩千萬元嘅王國潼話，佢同銀行借錢畀騙徒，揹咗筆龐大嘅債務，不過佢唔諗咁多，繼續埋首二胡世界。估唔到轉眼間，佢位於銅鑼灣旺區嘅二胡藝術中心物業就被收購，即刻解決咗債務問題。所以佢認為做人要「睇得開，放得低」，一切自有主宰。
同王國潼相識多年嘅貝鈞奇除咗鍾意睇足球、籃球及拳擊等體育賽事之外，亦好鍾意音樂，經常自己買飛去聽王國潼嘅音樂會。貝鈞奇笑笑口話，最近佢輸咗一單官司，使咗千幾萬元，不過都抱住「天跌落嚟當被冚」嘅態度，最緊要唔好被不快事件困擾。早排佢就去咗上海睇NBA，一張飛要八千幾元添！此行見到國際球星及欣賞精彩賽事，都值回票價喇！