政情：阿王 阿彪吼實補選翻生戰
立法會宣誓風波持續，政界預計中央下星期一就會出手釋法，到時至少喺宣誓時涉辱華嘅青年新政議員梁頌恆及游蕙禎，會因為拒絕或忽略宣誓而被取消議員資格；若然中央釋法時規定議員只可以宣誓一次，則有三個直選、兩個功能組別嘅議席需要重選。消息指，民主派同建制派都對補選議席虎視眈眈，建制派普遍認為要讓路畀早前立法會選舉輸咗兩席嘅工聯會（工記），暫定會由鄧家彪（阿彪）出選新界東，「阿王」王國興出選九龍西。若有更多席位出缺，先會由其他建制政黨搵人出選。
消息話，建制派已經認定中央透過釋法會令梁頌恆、游蕙禎失去議席，預料明年二月進行補選，到時建制派必定會全力搶攻議席。目前嘅討論中，以讓路畀工記嘅呼聲最高，阿王幾乎鐵定出選，不過有人似乎對阿彪出選有幾大意見，覺得阿彪上次選舉出盡力只得萬幾票，所謂朽木不可雕也，不如改由外形更討好、職位更高嘅工記理事長吳秋北出選，可能勝算更高；亦有人認為，獨立建制派比基層建制派有市場。
王：戰勝港獨先算
我哋問過阿王，佢直認唔排除積極考慮參與補選，不過依家講補選仍然係言之過早，都係戰勝港獨先算，事關處理反辱華等嘅民族大義問題更為重要。如果阿王真係「敗部復活」重拾議席，咁佢啲金鉸剪、天殘腳、侍產嬰等道具咪可以重出江湖，唔使為咗搵人收留而申請非物質文化遺產喇！
除咗建制派，聽聞各路人馬都有討論補選安排，民主派有人提出，由失去新界西議席嘅工黨李卓人空降新界東，不過到時要同新民主同盟嘅范國威拗數；至於九龍西就有民協馮檢基、譚國僑同黃毓民覬覦，而預料被取消議席嘅青年新政會否搵人出選，仍係未知之數。照咁睇，民主派都好大機會自相殘殺，提早協調嘅建制派隨時大獲全勝。