中環出更：廠入城大 見證開心時刻
中華廠商聯合會（廠商會）最近頻頻捐助各大學，早前就輪到香港城市大學。城大特別舉行廠商會演講廳命名典禮以表謝意，廠商會會長李秀恒、副會長史立德及常務會董黃家和等一班會董齊出動，與城大校長郭位等校方高層一齊見證開心時刻。
卓妮見一班大男人於揭幕儀式完結之後，貪得意企喺講台上扮講書拍照留念，其中史立德扮得似模似樣，唔知佢有冇客串過講書呢？佢就話冇，不過喺城大讀過書就真，事關佢早幾年喺城大修讀行政人員工商管理碩士（EMBA），當時好多同學及老師都係相識嘅，所以上堂特別開心。
黃家和無緣教史立德
黃家和就真係有喺城大教書喇，不過就無緣教過史立德。黃家和話，自己同其他老師一樣，最鍾意上堂時會積極畀反應嘅學生，仲話如果成班學生對老師講嘅嘢冇晒反應，同對住幅牆講書冇分別喎！
咁如果學生係相識嘅朋友，好似史立德呢啲EMBA學生，唔知黃家和會唔會覺得難教呢？佢就話唔會，因為讀EMBA嘅學生都咁大個人，會選擇重返校園嘅都係有心學嘢，再加上依家教書係分享形式多啲，所以都唔怕學生唔聽書難教喎！
同場仲有廠商會永遠名譽會長楊孫西、副會長吳宏斌等人。楊孫西透露對腳已經好番少少，早前仲去咗福建武夷山採茶，上山落山少啲體力都唔得咁話。
卓妮