犯東方雖遠必誅 不作死就不會死

內地有句潮語叫「No Zuo No Die」,即係唔作死就唔會死咁解,用嚟形容嗰啲反中亂港嘅九流傳媒就貼切不過嘞。事關佢哋係都要(抓)爛塊面,自暴其醜,自取其辱,呢啲唔係犯賤係乜吖?

係咁嘅,自由亞洲電台日前有篇文章大放厥詞,將《東方日報》近日批評港澳辦前主任廖暉係亂港之源嘅報道穿鑿附會,仲搵個蛋頭學者亂噏當秘笈,話《東方》加入《成報》陣線,係中央派系鬥爭延伸到宣傳喉舌喎。成篇文章狗屁不通,荒誕無稽,偏偏阿波羅網人云亦云加入轉載,簡直貽笑大方。

係人都知,《東方》為民喉舌,一直本着是其是、非其非嘅方針辦報。港澳辦前主任廖暉在位十幾年,除咗同權貴勾勾搭搭,同埋疑似送錢畀貪官許仕仁之外,都唔知佢做過乜,事實係,佢從來冇對香港事務出過一粒聲,任由餘孽呼風喚雨,卒之搞到今日烏煙瘴氣,七國咁亂。《東方》報道事實真相,同所謂政治鬥爭八竿子打唔到一處,自由亞洲電台係都要狗口長不出象牙,將《東方》同《成報》相提並論,如果話唔係別有居心,講都冇人信喇。

不如等功夫茶踢爆呢個所謂電台到底係乜嘢料吖。佢哋背後由美國國會資助,收羅流亡海外嘅民運分子同政界人士出面主持,講到尾就係美國反華嘅爛頭蟀。咁仲唔止,呢個電台仲被指同疆獨勢力同流合污,唯恐天下不亂。大家睇到喇,反中亂港傳媒專門搞風搞雨,硬要將《東方》拖落水,無非因為《東方》堅持民族立場,而且仲係本港傳媒嘅中流砥柱,有人唔抵得咯喎,咪乘機上綱上線、屈得就屈囉。

話時話,針對《東方》嘅點止一個洋人撐腰嘅電台呀,直情係來自四面八方,無遠弗屆,佢哋以挑釁《東方》為能事,不過最終都會付出代價。嗱,唔好講本港有唔少傳媒及網站因為誹謗《東方》而自取其咎,唔係賠錢就係道歉收場,淨係台灣啫,因為誹謗《東方》而等住上庭受審嘅亦大排長龍,幾壯觀(口架)。好似《臺灣時報》咁吖,就因為誹謗《東方》被判成立,結果要喺網站首頁刊登道歉啟事,死死地氣承認有關報道「全屬不實指控及虛言」,向《東方》表達「衷心毫無保留嘅道歉」喎,咁你話下一個跪低認錯嘅傳媒會係邊個呢?

講到呢度,功夫茶諗起《水滸傳》入面綽號「無毛大蟲」嘅潑皮牛二,佢明知楊志武藝高強,偏偏一味撒潑,結果捱咗一刀,呢啲咪叫先撩者賤,打死無怨囉。唔通嗰啲找死嘅人,一定要死喺英雄好漢嘅劍下先至感到痛快?

一句講晒,犯《東方》者,雖遠必誅,雖惡必誅。對於鬼魅魍魎輪番出陣,含沙射影,《東方》雖然感到憤怒,但亦感到光榮,事關東方之劍削鐵如泥,吹毛立斷,既然潑皮牛二之輩咁鍾意犯賤,咪即管畀佢哋賤個夠囉!