我有正能量：街坊支持 重建社區情誼
近期在土瓜灣一帶屢屢有流浪貓疑被虐殺，令人不禁懷疑是否有「連環貓殺手」潛伏社區。當小白、Ivan及阿麟三人成立巡邏隊，即得到了一眾街坊「集氣」支持，最近更有人主動借出單車，又有人免費提供維修，令這因港鐵通車而變天在即的舊社區，再次凝聚鄰里情誼。
盼漣漪般推及其他地區
「依家都有十個街坊加入，會大家一齊出去巡。」Ivan指，希望每夜均有人出去巡邏，惟現時行動仍處於摸索階段，加上具一定危險性，每次均會全體出動，故不可單獨或減少小組人數出動，「所以都想多啲街坊加入，日後大家熟悉咗點做，就可以巡密啲。」
阿麟則指，期待行動可以喚起港人對流浪動物權益的關注，日後像漣漪般推廣至其他社區，「希望呢區只係一個起點，呢種以社區網絡為本嘅組織，之後會喺其他地方，由嗰度居民推動。」