政情：19人聯盟挑機建制派 醫學界爭選委掀激戰
特首選舉委員會選舉下月就會開始報名，而兩屆醫學界選委區耀佳、杏林覺醒成員黃任匡，以及九龍城區議員鄺葆賢尋日就宣布，牽頭並聯同十六名醫生組成「真普選醫生聯盟」，務求打破建制派喺醫學界選委嘅壟斷。
聯盟以「換人換制度，堅持真普選」為主題，希望將非建制追求民主同改革嘅聲音帶入選委會，由內部動搖選委會呢個不公義制度喎。佢哋要求特首施政以香港人為本位，亦都要重啟政改，推動真普選，更表明絕對唔會含淚投票，若然冇候選人符合上述要求就唔排除投白票添！
區耀佳話名醫離地
不過，醫學界選委過往多數由資深、而且擁有較高知名度嘅人士當選，而聯盟就只得三位牽頭人較為知名，咁咪相對蝕底？聯盟就話，近年公民社會有所演變，名氣已經無以前咁重要，區耀佳更話名醫離地，不知民間疾苦添！但黃任匡隨後又透露，聯盟已經邀請到一啲前輩同知名人士作為推薦人，當中更包括立法會議員陳沛然，睇嚟聯盟都係唔敢輕視名氣嘅作用囉。