政情：蘇錦樑 高永文剝花生睇特首戰
特首選戰由退休法官胡國興日前宣布參選揭開序幕，多位潛在候選人隨即蒲頭隔空駁火，呢場選戰未入戲肉已經好有睇頭，難怪商務及經濟發展局局長蘇錦樑（Greg蘇）都買定花生睇好戲，仲請埋食物及衞生局局長高永文一齊食添！Greg蘇喺今屆任期搞乜衰乜，留任機會凍過水，自然剝住花生等任期完結，但高永文都諗住「跳船」離開？
Greg蘇搞乜衰乜等收工
特首梁振英（CY）早幾日寫咗篇網誌，呼籲管治團隊「心無二用」為社會做事，但團隊之一嘅Greg蘇同高永文似乎唔多聽話，皆因兩人迷上剝花生。佢哋兩個尋日出席第五屆香港食品嘉年華時，心情非常輕鬆，又有傾有講咁周圍遊覽買嘢食，期間Greg蘇就用咗二十蚊買咗包花生，請高永文食花生咁話。
高永文一於唔客氣接受，仲反問Greg蘇喺立法會剝好，定係喺特首選戰食好，Greg蘇即刻拍一拍高永文膊頭，話喺邊度都得，總之一路食一路睇！兩人始終係問責局長，咁快擔定櫈仔剝花生，分分鐘押錯注，唔通兩個都唔使諗去留問題？
論任內四年幾政績，Greg蘇可以話係「搞乜衰乜」，先係《二○一四年版權（修訂）條例草案》無限期押後，被建制派私下批評為「豬隊友」；其後免費電視發牌被人寸佢用「一籃子」因素；近期就有dbc停播，數碼聲音廣播政策幾近玩完。拎住份咁差嘅成績表，即使最後邊個做特首，睇怕佢都無乜機會留低喇，難怪佢擺出一副「局外人」嘅心態等睇特首選戰啦！
高永文漏口風想操故業
不過，點解高永文又剝埋一份呢？高永文上任以來，面對雙非孕婦同奶粉荒問題不過不失，但就喺上屆立法會尾聲處理醫務委員會改革方案觸礁，扣咗分，但要留任又唔係冇機會嘅。不過，早前被問到如果CY成功連任，佢下屆會唔會留任，當時佢話唔講住，但就漏口風有興趣重拾臨床專業工作，尋日仲收咗Greg蘇包花生添！至於點睇呢場特首選戰呢？佢就一於「永遠認同老闆的看法」，話作為現任問責局長，責任係做好份內工作，所以唔會評論其他人嘅參選情況喎。