中環出更：劉馬露明囝囝 排隊入讀媽咪教育中心
香港社會競爭激烈，唔少父母都希望子女唔好執輸而落後於人。港鐵主席馬時亨長女劉馬露明（Christine）就透露，已經為四個月大嘅囝囝報名，喺佢創辦嘅JEMS Learning House教育中心嘅輪候名單之上。Christine解釋，因為佢對教育中心嘅團隊非常有信心，加上佢亦都會經常喺中心工作，除咗可以增加同囝囝見面時間，又方便照顧，更容易掌握囝囝學習情況，難怪會有咁嘅打算喇！
奧恩國際幼兒園暨幼稚園尋日舉行開放日，捧場嘅Christine透露，坊間已有唔少學術培訓嘅地方，所以佢希望小朋友能夠喺遊戲中學習良好品格，從而有一個平衡嘅發展。佢嘅媽媽馬王培琪亦都認同品格教育對幼兒非常重要，更話以前為女兒挑選幼稚園時，亦都着重品格，同現時嘅家長並無大分別。
馬王培琪拒過分催谷學業
不過，馬王培琪就大讚現時嘅幼稚園設施多元化，好似加入科技元素，認為有助幼兒發揮潛能。但講到時下嘅怪獸家長時，佢就認為係風氣問題，而佢亦唔贊同家長過分催谷學業，因為小朋友嘅長處各有不同，只着重讀書可能會埋沒佢哋本身嘅天賦。
同場仲有拔萃女書院校長劉靳麗娟，佢認為女性從事幼兒教育會較為方便，因為比較細心，能夠好似媽媽咁照顧小朋友。不過，佢就話現今社會開放，無一個職業會用性別去定型，即使教育行業都一樣喇。而理工大學副校長阮曾媛琪就話，從事教育最緊要有熱誠，同埋關心學生，性別並非重要因素。
卓妮