俗語有話，曹操都有知心友，關公也有對頭人。假難民搞到香港雞毛鴨血，天怒人怨，偏偏有人爭住幫佢哋出頭；仲要出言侮辱連番踢爆相關亂象嘅《東方》，公然與民為敵，簡直不知所謂。
話說立法會尋日開會，討論成立跟進免遣返聲請統一審核事宜嘅小組委員會，本來呢個係民心所向，早就應該咁做，偏偏有議員提出質疑。有同事好心提醒佢不如睇多啲東方嘅報道，點知惹來張超雄加入戰團，諷刺不如成立「東方之友小組」，佢仲大放厥詞，話東方嘅報道對南亞裔同難民有歧視成分，又話議員推銷一份咁嘅報紙令人遺憾喎。
講到呢度，功夫茶不期然為張超雄喺大學嘅學生擔心，講師喎，連咩叫「歧視」都未識解，咪盞誤人子弟。大家有眼見，東方踢爆假難民禍港黑幕，全部有官方數據為證；至於涉及南亞兵團嘅罪案無日無之，唔係打黑工就係販毒，唔係傷人就係非禮，呢啲都係不爭嘅事實，何來歧視？正如有立法會議員話齋，反對派經常將新聞自由掛喺嘴邊，依家憑咩質疑報章公信力，憑咩踐踏新聞自由？再講吖，東方鍥而不捨窮追猛打，保障香港人免除恐懼嘅自由，如果咁都算歧視少數族裔，咁張超雄對假難民搞到香港永無寧日視而不見，豈不是歧視七百萬市民！特別係元朗等假難民肆虐嘅重災區，街坊幾乎要發起「更練團」自保，家陣居然有人公然替假難民背書，係咪應該考慮向平機會投訴呢？
話時話，張超雄之流手指拗出唔拗入，都唔係今時今日嘅事喇。早排立法會選舉期間，街頭出現諷刺張超雄係「難民之父」嘅惡搞橫額，仲配埋中英文單張，之所以個個唔惡搞淨係惡搞佢一個，咪因為佢老哥幫假難民奔走呼號，形象深入民心，入型入格囉。
講到盲撐假難民，除咗張超雄之外，早排仲有團體發起所謂「撐難民大遊行」，呼籲「停止種族分化」，甚至焚燒《東方日報》洩憤。如果大家以為呢班人只係出於無知嘅「真心膠」，咁就大錯特錯嘞。空口嗌幾句高大空口號，邊個唔識，換轉受害嘅係佢哋屋企人，睇吓佢哋仲可唔可以「大愛包容」、「博愛平等」吖嗱？有人話既然班政客咁有「愛心」，就應該自己出錢出力出地方，接濟佢哋口中嘅所謂「弱勢群體」。嘥氣喇，班友爭取加薪加津貼，着數舔到盡就叻，叫佢哋自掏腰包，發夢冇咁早。政客們為爭取「人權衞士」道德光環，不惜犧牲港人福祉，唔單止偽善，直頭係無恥！
所以話啫，港府姑息養奸，司法慈悲為懷，再加上無恥政治小丑助紂為虐，假難民問題有乜法子唔尾大不掉？香港人除咗靠傳媒繼續發揮第四權天職，揭醜揭弊，仲有咩指望？