立法會內務委員會尋日開會，提名議員加入香港大學及香港中文大學校董會，以及其他諮詢團體。之前港大校委風波搞到滿城風雨，但尋日內委會中，港大校董嘅選舉竟然無風無浪，五名獲提名議員自動當選。反而中大校董會選舉就出現七人爭三個位嘅局面，最後全數被建制派包攬，分別由飲食界張宇人、本身係中大校友嘅民建聯劉國勳、工聯會何啟明奪得。
對於咁嘅結果，非建制派當然鬧爆，但何啟明同劉國勳都係議會新丁，何啟明當選時更被網民揶揄唔識佢，佢哋返中大開會隨時被學生玩殘。
尋日內委會提名議員加入中大校委會，原本建制及非建制協商，非建制方面會由建築界姚松炎加入，但非建制派另外仲提名埋人民力量陳志全、民主黨黃碧雲及本土派朱凱廸，逼到建制派包攬晒三個校董。中大學生會隨即批評建制派操弄選舉。而中大校友捍衞院校自主關注組亦懷疑同中大遴選新校長及校董會改組有關。
至於港大校董分別由本身係校委會成員嘅石禮謙、民建聯張國鈞、新民黨葉劉淑儀、教育界葉建源及公民黨毛孟靜出任。
另外，內委會亦選出議事規則委員會、行政管理委員會、政府帳目委員會及議員個人利益監察委員會等成員同正、副主席，本土自決派全面捧蛋。而陳志全原本想加入行管會及議事規則委員會，但亦被建制派「封殺」。