政情：委會爭奪戰 本土派「捧蛋」
立法會十八個事務委員會經過呢兩星期大混戰後，除了民政事務委員會副主席一席仍然懸空外，其餘嘅正、副主席已經選出。喺建制派同非建制派傾唔掂數嘅情況下，雙方都以「冧友」方式搶攻，最後非建制派喺已選出嘅三十五個正副主席位當中，成功奪得十七個位，包括六個主席同十一個副主席。雖然今次本土派議員有被提名，但點知全數「捧蛋」，只怪本土派顧住玩嘢，對議會工作懶懶閒。
泛民佔比例高於議席
今屆非建制派陣營所佔嘅議席係百分之四十三，而佢哋喺事務委員會所得嘅正副主席位，就佔總數百分之四十九，比議席比例仲要高。非建制派奪得嘅十七個正副主席位當中，除咗非建制、非泛民嘅醫學界陳沛然佔一席，其餘十六個就由傳統泛民政團包攬，其中民主黨同公民黨各佔五席，由功能界別議員組成嘅專業議政同樣搶到五席。而仲有一席，就由早前主持立法會主席選舉時做「逃兵」嘅街工梁耀忠當選。
建制派方面，包攬十八個正副主席位，當中有十二個係主席，六個副主席。建制派大贏家非民建聯莫屬，一共有六席，其次就係有四席嘅經民聯。至於工聯會同自由黨就分別有三席同兩席，剩低三席就分別由商界廖長江、體文界馬逢國同獨立何君堯當選。
鄭松泰梁國雄缺席會議
泛民今次「搶凸」情況下，即使本土派佔非建制派之中嘅七席，但正副主席位一個都冇。早前未完成宣誓嘅青年新政梁頌恆被提名做教育事務委員會主席，雖然佢未宣誓冇得出席尋日會議，但都仲可以參與主席選舉，但可惜提名、有份和議佢嘅熱血公民鄭松泰同社民連梁國雄都缺席會議，最終佢「捧蛋」收場。講到底，本土派議員唔係未宣誓冇得開會，就係有會都唔開，人影都冇個，唔通要其他民主派搶埋個位等你坐咩！