中環出更：進出口挑戰大 網購拓市
網購盛行，好多過往難買到嘅嘢，依家安坐家中上網就可輕鬆買到。香港中華出入口商會（中出）早前舉行第三屆進出口企業大獎頒獎禮，卓妮見到做開糧油進出口生意嘅籌委會副主席李豐年（Kenneth），佢話，其實一啲港人認為好普通嘅食物或日用品，喺其他地方可能好少見到或好難買到，而網購係一個好好嘅平台將產品外銷。
Kenneth話，進出口業近年面對唔少挑戰，運輸人手短缺，長期請唔到人，用街車又太貴，所以老闆自己揸埋車運貨嘅情況不時出現。而面對成本上升，佢哋亦主動出擊開拓市場，近期就發現唔少香港常見食物如即食海蜇及冬菇，原來喺台灣唔係咁易買到，所以佢哋就同台灣網購平台合作，配合台灣人網上購買食品嘅習慣。
許華傑借老友仔女做模特兒
當日除咗公司有份得獎嘅泉昌董事黃楚恆及從事電子產品行業嘅賴偉星外，同場仲有會長張學修、副秘書長李秀恒、許華傑同籌委主席彭楚夫等。見許華傑同香港出口商會會長丁天立好好傾，原來許華傑依家代理咗個童裝牌子，早前搵埋會內老友蔡德昇嘅仔女做模特兒，咁啱丁天立兩個小朋友又係十幾歲，唔知有冇興趣試吓鏡呢？
常董陳建年同會董陳少山同霍立禮幾個都係做食品生意。本身熱愛美食嘅霍立禮近年喺九州生產手工清酒，食正近年日本酒趨勢，受部分名人愛戴。而陳少山就帶杧果同榴槤等甜品進駐內地遼寧等地，話北方較難食到咁鮮味嘅杧果，所以大受歡迎。
卓妮