政情：蔡冠深翻兜 出任中總會長
四大商會會長之位每次有變動都特別多人關注，其中將喺十一月換屆嘅香港中華總商會人選尋日終於塵埃落定，一如外間所料，由曾經擔任過會長嘅蔡冠深翻兜，再次膺選為第五十屆會長，任期由本年十一月至一八年十月。
其實蔡冠深翻做會長一事都傳咗成年，而早在佢之前，亦曾有翻兜做會長嘅例子，就係中總永遠榮譽會長曾憲梓。加入中總多年嘅蔡冠深曾先後擔任會董、常務會董同副會長等職務，更於○八年十月首次獲推選為中總會長，歷任第四十六及四十七屆會長，卸任後獲頒任永遠名譽會長，對會務可以話係好熟悉。
另外，八位副會長人選亦同時出爐，除連任嘅袁武、林樹哲、曾智明同王國強外，將有四位新副會長，包括劉鐵成、王惠貞、李應生同楊華勇。至於現任會長楊釗、副會長李德麟、莊學山、盧文端同馬忠禮則將榮任永遠榮譽會長，至於新一屆會董就職典禮已定喺十二月二日舉行。