有人話玲瓏浮凸身材嘅最佳例子，相信只有芭比娃娃可以體現出嚟，事關佢擁有令每位男士心動嘅身材。其實喺現實世界中，亦有唔少代表人物，好似南韓超人氣車模金多溫就係其中一位。
現年25歲，出生於南韓慶尚南道嘅金多溫，相信每一個男人見到佢都會被迷人嘅樣貌，同埋37、25、36玲瓏浮凸嘅火辣身材所吸引，加上一對修長美腿，絕對係男人心目中嘅女神。既然佢如此迷人，試問又點可以將天賦魅力埋沒呢？故此佢喺2012年參加選美比賽，希望為人生帶嚟唔同嘅體驗，結果憑住亮麗外形，贏得最佳美態獎。及後，佢獲得模特兒公司垂青，邀請參與模特兒工作。及至2014年初，佢首次以車模身份喺首爾車展上登場，佢表示起初表現得有啲緊張同拘謹，只係話晒喺選美比賽中見過大場面嘅佢，不但好快適應喺眾多鏡頭前展現自己，並且以專業嘅態度完成演出。自此以後，佢不但成為各大車展中嘅常客，為唔同嘅汽車品牌站台，同時又以賽車女郎嘅身份喺賽車場上登場，而佢每次演出亦唔介意以性感造型示人，尤其係激凸嘅上圍，每次現身都會成為全場焦點。
如此火辣嘅身材唔單止獲得粉絲一致好評，就連同佢合作過嘅攝影師亦對佢讚譽有加，異口同聲話佢嘅身材堪稱係線條嘅藝術。但另一邊廂，卻惹嚟質疑嘅聲音，懷疑阿妹造假。佢表示擁有玲瓏浮凸嘅身材，係因為平時嚴格嘅生活所換取返嚟，為咗保持身段，佢花咗極多時間喺鍛煉之上，尤其係瑜伽更係每日必做嘅運動。另一方面，佢十分注重飲食，不但限制每日攝取糖分嘅分量，而且訂下一系列嘅營養餐單。事實上，憑住迷人嘅外形，唔單止令佢喺車模界獲得極高人氣，而且以時裝模特兒身份，喺各種潮流及男性雜誌中亮相。去年佢更踩入寫真界，先後推出多本性感寫真，並且以唔同嘅造型為大家帶嚟唔同嘅視覺體驗，等大家可以從更多角度，欣賞佢嘅迷人體態。
簡介：金多溫雖然工作相當忙碌，但每當有時間嘅時候，佢都會去旅行放鬆自己，而每次旅行時，總會喺社交網站同大家分享旅遊點滴。不過由於佢工作太過忙關係，故此每次只能夠作短途旅行，難怪佢慨嘆唔知幾時先至可以放到一個悠長假期。
網址：https://www.instagram.com/daondaonhae/
出生地：慶尚南道
身高：174cm
三圍：37、25、36
撰文：魂