政情：泛民傘兵爭做選委搶櫈仔
新一屆選舉特首嘅千二人選舉委員會，下個月八號開始接受提名，包括高等教育界、社會福利界、會計界同建築、測量、都市規劃及園境界在內最少四個專業界別，非建制派已密鑼緊鼓開始組隊。喺「佔領行動」後，呢四個界別已有人放風，話每個界別最少會分傳統泛民同傘兵兩條隊，話分兩隊都唔係要鎅對方票，而係會合作協調，務求攻佔最多選委席位。唔單止兩隊，有啲界別仲會分成四、五隊，搞到選民花多眼亂，分分鐘唔知邊個打邊個？
非建制或首次攻陷建築界
建築界選委有三十個名額，一向被視為「梁營」票倉，但非建制嘅姚松炎喺今屆立法會建築界功能組別成功突圍，外界預計今次選委爭奪戰，非建制人士將首次攻陷建築界。消息指，現任傳統泛民、建築界選委、民主黨嘅吳永輝，將會同前灣仔區議員、建築師陳耀輝等人，組成「專業．民主．起動」平台參與選委爭奪戰。加上另一隊由姚松炎領軍嘅傘兵，預計非建制派將派出二十幾人搶攻建築界。吳永輝尋日講明會參與泛民之間嘅協調，目標係最少搶攻二十席。上屆梁振英競選辦成員鄔滿海亦有出戰建築界選委，最後做咗「票王」。吳永輝團隊就相信鄔滿海會有部署，計劃仍然暗潮洶湧。
同樣有三十席嘅會計界亦至少有兩張名單，立法會會計界議員梁繼昌已表明，支持由民主派同傘後組織組成「進步會師」嘅二十一人團隊，即使整張名單當選，都仲有餘額，會計界前議員譚香文亦籌組緊名單，希望「包底」攞埋剩餘九席，目標係令非建制派全取三十席。
另一非建制票倉、同樣有三十席嘅高等教育界，據知已有最少三張名單，包括獲傳統泛民支持嘅城大專上學院講師黃志偉，據了解「佔中三子」之一、港大法律系副教授戴耀廷亦會排同一名單出戰，另外兩條隊就會由港大教師及職員會主席張星煒同推動傘後自決嘅黃慧麟領軍。過往泛民足以攞晒呢個界別三十席，但仍會留番一部分畀各院校工會，今屆就未知會唔會喇！
社福界競爭大 80人搶60席
至於有六十席嘅社福界，上屆已有七十人爭，餅仔都唔夠分，今屆非建制陣營嘅社總主席葉建忠、社工復興運動等組織就派出五隊參與選委爭奪戰，但依家已有八十幾人爭六十席，社福界議員邵家臻就話會再開會，傾傾點樣可以縮減到七十人以內。