中環出更：意外早一個鐘發生《蘋果》弄虛作假
早前唔少團體踩上壹傳媒黎智英（漢奸黎）寓所門外，抗議佢旗下嘅《蘋果日報》作新聞，尋日該報嘅網上即時新聞弄虛作假，有關長沙灣一宗交通意外嘅報道建立時間，竟然較意外發生時間早咗起碼一小時，唔通該報未卜先知，否則就係專登將該報道嘅建立時間提早，意圖欺騙讀者。
事緣尋日朝早八點幾，一部新巴雙層巴士及一部小巴（紅Van）喺長沙灣順寧道與興華街交界猛烈相撞，意外導致兩車司機及紅Van上十三名乘客，合共十五人受傷，然而《蘋果日報》網上即時突然新聞網頁，該篇報道嘅建立時間標示係「07:09」，即係早上七時零九分，而內文則寫上意外嘅發生時間係「八時許」，明顯建立時間較意外發生的時間提早咗起碼一小時，簡直係自打嘴巴，唔通該報預知一個小時後該處有意外發生？否則就係刻意將該篇報道嘅建立時間提早，弄虛作假。
《東網》喺傍晚約六點時報道呢件事，《蘋果》網頁喺晚上「20:50」將建立時間改為「08:21」。
卅人上門鬧漢奸黎
話口未完，尋日朝早十一點左右，約三十名聲稱自發人士，踩上漢奸黎位於何文田嘅寓所外示威，佢哋手持印有「賣港求利 黎狗無恥」、「操縱選舉 禍港殃民 煽動港人」及「黑金亂港」等標語，並大叫口號，又將印有漢奸黎頭像嘅海報及溪錢放到地上，然後大力用腳狂踩，直至下晝四點左右，示威者和平離開。
近期針對漢奸黎嘅示威行動不絕，自六月十日起計，包括尋日嘅行動，到漢奸黎寓所及將軍澳壹傳媒大樓外示威嘅行動最少達六十六次，當中自稱霸王國際集團員工及苦主佔十次、正義聯盟佔三次，旅遊業界同其他人士則有五十三次。
卓妮