乜嘢叫眾怒難犯？睇下私營院舍院長涉嫌性侵智障女院友獲放生呢單畸士愈鬧愈大就知嘞，除咗立法會議員及關注團體紛紛要求律政司解畫及重新檢控，警方表示會繼續調查，尋日就連社署都話會將有關院舍「釘牌」，證明呢單嘢已經去到天怒人怨嘅地步。
不過咁，話社署將涉案院舍「釘牌」都唔係咁準確嘅咋，事關該院舍一直只有豁免證明書，連牌都未有，你話係咪一筆糊塗帳吖。大家有眼見，涉事院舍問題多多，該院長之前已牽涉非禮女院友嘅案件，今年八月又有一名十四歲院友疑受欺凌自殺，簡直就係亂象叢生。社署雖然承認曾向該院舍發出多封勸喻信，但就一直容許豁免領牌，直頭姑息養奸、為虎作倀喇。
聽吓社署點講喇。由於涉事院舍未能於限期內完全符合社署發出嘅糾正指示規定，而且喺管理及營運方面仍然違反實務守則，徵詢法律意見後決定向院舍發出擬撤銷豁免證明書通知，並會協助院友轉院，仲話未來發牌時考慮加入審核營運者嘅罪行記錄喎。咁即係點？即係證明院舍平時無王管，無掩雞籠咯喎，咪引狼入室囉。難為社署仲死撐有關決定同今次性侵案無關，呢啲咪叫此地無銀三百両囉。
睇吓數字就知嘞，社署話就話最近三年向私營院舍進行逾五千次突擊巡查，發出逾千封勸喻信，之但係從來冇院舍被吊銷牌照或停發豁免證明書，即係巡查係做騷咁做喇。就算《殘疾人士院舍條例》已經生效，一樣冇院舍被檢控，擺明隻眼開隻眼閉喇。你話唔係咩，有關條例嘅原意係提升私營院舍質素以達至領牌條件，但現時全港三百多間院舍之中，有牌嘅佔幾十間咁大把，大部分只係領有豁免證明書。社署監管唔嗲唔吊咯喎，院舍質素自然良莠不齊，幾污糟邋遢嘅事都會發生喇。
講到尾，又係政府推卸責任惹的禍。好似殘疾院舍咁吖，政府津貼嘅宿位嚴重不足，每年有數千名中度及嚴重智障人士輪候，但平均每月只有百多人成功獲得編配，供不應求之下被迫轉投私營市場，偏偏社署監管馬虎兒戲，關人個關，卒之搞到悲劇不絕如縷。呢，最近又有一單智障院友疑被職員虐待嘅畸士審緊，證明情況幾咁普遍，弱勢人士嘅權益真係冇乜保障嘅咋。
講起真係諷刺，香港係富裕城市，港府錢多到發霉咁滯，偏偏好多弱勢基層孤苦無依，甚至飽受欺凌，同雨果筆下嘅悲慘世界冇乜分別。港產官僚如果仲有良心嘅，唔該做番好監管及支援，最起碼將嗰啲衣冠禽獸繩之以法吖。