政情：選舉開支 陳健波最慳家
立法會選舉結束約個半月，選舉事務處陸續公開各參選人嘅選舉開支申報。其中喺保險界自動當選的陳健波，選舉開支最為「慳家」，僅花費二千五百多元，比鄉議局界劉業強嘅二千六百多元仲要少。陳健波嘅選舉開支，主要用於外聘助理服務、拍攝同沖曬相片，其次係交通費、影印費等，期間亦冇收受任何捐獻。
陳振英獲捐獻九成 僅掏千元
同樣係自動當選嘅金融界陳振英，選舉開支則較陳健波多出近八倍，花費二萬一千多元。本身係中銀香港董事會秘書嘅陳振英，選舉開支只用於同傳媒聚會、租金、辦公室及運輸，中銀香港前後為佢提供二萬多港元捐款，變相為佢支付超過九成選舉開支，所以佢實際支付嘅開支只係一千元。
同為功能界別，但遇到對手挑戰嘅體育、演藝文化及出版界議員馬逢國則花費不少，前後花費近十二萬元，其中租金連運輸等已經花費近三萬元，聘請代理人及助理更花去四萬三千多元，而佢喺選舉期間並冇收到任何捐款。