政情：民主阿婆 李漢奸 (舌累)外國干政 攞架嚟丟

李厚面皮賴中方施壓

民主阿婆同李漢奸之前去澳洲，喺當地接受傳媒訪問時又再對香港事務指指點點，危言聳聽，仲乞求澳洲政府關注。呢幾日佢哋就轉往新西蘭，唔知係咪因為佢哋講來講去都係三幅被，了無新意，就被新西蘭政府請食閉門羹。話說佢哋原定於當地時間嘅本周二朝早，同新西蘭財政部長兼副總理Bill English會面，但Bill English就喺星期一夜晚取消會面，而Bill English辦公室更表明，呢個星期嚟緊都唔會安排到任何時間同佢哋見面，真係大大個檸檬請佢哋食。

被新西蘭政府冷待，李漢奸當然又喺度呱呱嘈質疑中方施壓啦，又話佢哋每次離開香港，中國大使館都會大力游說當地嘅人唔好見佢哋。正所謂「面就人哋畀，假就自己丟」嘅，Bill English之後回應當地傳媒查詢時就話，取消同民主阿婆、李漢奸會面，並非因為中國政府施壓。

前年訪英國已遭冷待

而新西蘭嘅國防部長Gerry Brownlee就向當地記者指出，同民主阿婆、李漢奸嘅會面喺外交上係敏感議題，因為佢哋嘅外交部長Murray McCully正訪問北京，唔想分散注意力。講到尾，人哋唔得閒騷民主阿婆同李漢奸呢啲小人物囉，難為佢哋仲好意思煩住人哋。其實佢哋前年七月訪問英國，都已經被冷待，自取其辱。

民主阿婆二○○○年仲係政務司司長時都去過新西蘭，當年佢都有同當地政商界同學術界重要人物會面，官式訪問就話接待啫，依家民主阿婆已經冇咗政治光環，淪為舊電池，同一位普通市民冇分別，冇人理都係理所當然啦！