中環出更：立會宣誓未完 何君堯想打尖動議
建制派議員前日為阻青年新政議員游蕙禎同梁頌恆宣誓，不惜拉隊離席，發動流會。本身係律師會前會長嘅議員何君堯尋日就打算再下一城提出動議，將議員嘅宣誓程序押後至政府提出司法覆核案件完結為止。不過，《議事規則》第十八條寫明會議嘅事項須依照次序處理，而首項就係要進行宣誓喎，究竟何君堯想以咩方式提出動議呢？
何君堯話，建制派議員集體離場，只係非常時期用非常手段，但唔可以解決核心問題，佢建議押後宣誓程序，先審議其他議案，可避免因建制派離場而導致流會，佢又覺得雖然《議事規則》有限制會議次序，但認為立法會主席有酌情權押後宣誓。據了解，佢係打算引用《議事規則》第二十九條（一）同十八條（二），包括立法會主席提出動議可以毋須預告，以及立法會各類事項都要由主席批准。
不過，其實十八條講明，除宣誓之外其他事項都要由主席批准，似乎無咩關係，而同一條更列明宣誓未完成，點都無可能進入動議程序，所以其實點講都係「嘥氣」。立法會秘書處話，收到何君堯議員正式書面要求後，會進行研究，並向主席提交建議。
涂謹申開記招變「教路」
本來件事搞唔成應該好快就告一段落，點知今屆最資深議員涂謹申就為此事開記招，話估計何君堯係打算用《議事規則》第九十二條，若立法會未有作出規定嘅事，就可以由立法會主席決定。雖然佢邊鬧何君堯用旁門左道，但變相幫何君堯諗埋用邊一條規則。唔知何君堯會否揸住阿涂條理據，再去同主席商量呢？
卓妮