中環出更：周旋傳藝育人 憑歌寄民族意識
香港年輕人民族意識薄弱，令近年社會爭拗不絕，與其硬碰硬，不如用民族音樂予以潛移默化。人靚聲甜嘅女高音歌唱家周旋（Charlene）早前成立周旋藝術中心，專注培育中國民族音樂幼苗同未來新星，中心仲成功爭取成為中國音樂學院考級香港考區，係香港首個為中國聲樂及器樂考級嘅機構。Charlene話，希望帶動港人學習民族音樂嘅風潮，冀增強港人民族意識。
藝術中心早前舉行開幕典禮，並安排連串精彩匯演，到場欣賞嘅城中名人眾多，包括維多利亞教育機構校監丁毓珠同女兒孔美琪、太子珠寶鐘錶主席鄧鉅明同太太鄧宣宏雁等。
金刀梁自嘲歌喉嚇親人
外號「金刀梁」嘅標準工時委員會主席梁智鴻夫婦都去捧場，金刀梁揸手術刀就叻，唔知唱歌得唔得呢？點知佢自嘲一唱歌啲人就走晒，仲話如果想早啲散會就請佢唱歌喇！鄧鉅明亦笑自己同三名兒子都冇音樂細胞，雖然細仔有學鋼琴，但彈得唔叻。
中國音樂學院考級培訓學院院長馬彪亦專程來港見證香港考區正式啟動。佢話，香港嘅樂器考級一向以西洋樂為主，如果想考中國聲樂同器樂就要到內地。佢希望香港考區成立後，會吸引更多港人欣賞民族音樂。Charlene好有感觸話，近年中港矛盾日益激化，希望透過音樂拉近兩地民心距離，同時培育更多優秀藝術人才，為傳播同繼承中國民族音樂盡點力。
卓妮