政情：公民講場：甩過轆唔知驚 謝偉俊又玩離場

青年新政議員游蕙禎同梁頌恆喺立法會宣誓時發表辱華言論惹起極大爭議，建制派嘅政團同教育界都跳晒出嚟聲討佢哋，要佢哋道歉甚至取消佢哋嘅議員資格。獨立議員謝偉俊尋日就畀咗條好橋立法會主席，話若果游梁二人宣誓前唔道歉，就「吹雞」叫班建制派議員拉隊離場，搞到唔夠法定人數開會，直至響鐘前一分鐘先返入會議廳，重複幾次咁嘅做法，佢哋依然唔肯道歉，惟有製造流會，等佢哋冇得宣誓。不過，班建制派唔係好贊成咁做喎。梗係啦！建制派舊年喺表決政改方案前，就係因為拉隊離場而發生世紀大甩轆事件，見過鬼仲唔怕黑咩！唔通謝偉俊仲唔知驚？