政情：今日你上鏡：梁敬國頻操水「腹肌」仍六合一

即使恒常有做運動，都唔一定就有健碩身形。商務及經濟發展局副局長梁敬國（Godfrey），平日不時喺社交網站話自己去咗操水，但係佢前日參加渡海泳時，上載照片到社交網站，六舊腹肌就欠奉嘞，淨係見佢有個「六神合一」嘅肚腩，唔通操水真係冇效？Godfrey解釋，都係因為自己應酬多、食得多，加上一個禮拜練得一次水，每次亦只得千五米。至於肚腩就無助佢浮水喇，因為佢天生唔浮水喎。佢又話今屆渡海泳風大浪大，游得比去年辛苦，不過大會唔畀人戴錶，又冇幫佢計時，所以自己都唔知今年成績有冇差咗呀！