政情：林卓廷愛下廚 珍藏陳年滷水
喺新一屆嘅議員新丁當中，除咗民主黨（白鴿黨）嘅鄺俊宇係人氣作家之外，原來佢嘅黨友林卓廷（阿廷）都係廚藝高手。阿廷話自己細個時已經學吓煮嘢食，未做議員之前就會喺屋企煮飯畀老婆食。佢仲透露，有煲滷水已經跟咗佢十幾年，就算搬咗三次屋都仲係同一煲滷水。佢教路，整滷水雞翼最緊要係先煲熱啲汁，再放雞翼落去，仲要記得唔好煲滾，否則會煮到啲肉好「韌」。
阿廷話自己嘅拿手小菜係蘿蔔牛腩，仲曾經煮過一餐三十人分量嘅餸菜。三十人分量到底有幾多樣餸呢？佢話除咗蘿蔔牛腩，仲有滷水雞翼、雲吞水餃煲、蒸水蛋同埋西汁蝦。咦，不如叫佢露兩手，煮夠七十個議員嘅分量啦！
既然咁煮得，當然要同人分享吓，佢亦曾經教過啲街坊煮三杯雞，啲街坊試完都讚好。佢教路，話煮飯最緊要有三點，首先係啲材料要新鮮、其次係食物要煮熟、最後就係鹽分要適中，只要鹹味適中，其他調味料只要落少少都已經夠晒嘞！其實佢平時都會睇吓啲名人食譜，例如著名食家江太史孫女江獻珠、資深飲食評論家唯靈等，仲大讚唯靈嘅食譜幾乎個個煮出嚟都好食。