政情：續會變例會議員失「免費早餐」
過往立法會喺星期四續會，主席會自掏腰包請議員食早餐，但係今屆就冇呢支歌仔唱嘞！事關立法會秘書處尋日向議員發出嘅文件，話唔會再為議員提供早餐，咁班議員以後就再無免費早餐食。點解突然取消呢項「優惠」呢？新主席梁君彥就話喺上一屆，續會已經變咗好平常嘅會議，所以要小心考慮。其實潛台詞係因上屆不停咁拉布，搞到議事時間拖到好長，經常要續會，既然唔係特別事，又使乜額外安排免費早餐啫！不如慳番好過喇！
慣例始於首屆主席
其實免費早餐係源自首屆立法會主席范徐麗泰，事關嗰時星期三大會通常一日搞掂，亦試過開到午夜或凌晨，總之將所有議程完成為止，只係偶爾會喺星期四要續會，由於開會時間早，所以范太就自掏腰包請議員食早餐，而早餐大多係油炸鬼同粥等。
直到曾鈺成接手做主席，佢亦都跟番范太呢個慣例。但喺近兩屆嘅立法會，因為議會爭拗，再加上拉布拉到天昏地暗，搞到議事時間不斷拖長，為免搞到流會，曾經改喺晚上十點結束會議，之後更縮短到晚上八時，續會嘅情況變得好普遍。
再講，早餐要預先準備，要有足夠分量，而呢啲免費早餐初時都好多議員捧場，但久而久之，愈嚟愈少議員嚟食，造成好大浪費，據聞曾鈺成都諗過係咪要繼續落去。果然，喺新一屆立法會就冇嘞！
梁君彥：八點半開會平常
被問及點解取消免費早餐，梁君彥就話好耐以前偶爾會喺星期四開會嘅，但上屆呢，就變咗一個平常嘅會議，所以立法會要喺八點半開會都係好平常嘅，而基於呢啲原因，大家要小心考慮咁話。
其實梁君彥咁講都係反映現實啫，事關議會生態唔同咗，既然議員又冇乜咁殷切嘅需要，兼且佢哋都係自費食晏同晚餐o架喇，為免浪費食物做大嘥鬼，乾脆取消咗免費早餐，慳番荷包啲錢好過。