今年六月英國「脫歐派」公投勝出，令全球股市受到影響。原來連立法會都疑似受到影響，蝕咗超過五百萬元。根據最新嘅立法會行政管理委員會年報，上個年度立法會收入雖然增加咗約三千二百多萬元，由再上一年度嘅七億四千六百多萬元，增至今年七億七千八百多萬元。
不過詳細一睇，喺投資收入方面就由上年度嘅七百七十多萬元，跌至今年約九十五萬元。點解上年度投資收入少咗近九成呢？
根據年報內容，喺投資收入方面，今年零零舍舍喺匯兌淨值方面，虧損超過五百七十萬元，而上年就有十七萬元左右收入。咁啱喺外匯方面，正正就因為英國脫歐，搞到英鎊同歐元貶晒值，所以好大機會係因為立法會揸咗唔少英鎊或歐元，搞到蝕大本。
另外，計埋立法會會議同埋轄下委員會，上年度一共開咗八百三十三次會，比再上一年度多咗近一成，相信唔多唔少都係關拉布事。雖然會就開多咗，但大樓用電量都只係輕微上升咗二點六個百分點。
科技發展愈來愈發達，立法會都推行少用紙，再加上近年開始有好多議員都選擇帶手提電腦或平板電腦去開會。唔知係咪因為咁，所以立法會用紙量都少咗，有約一成八減幅。用紙量雖然少咗，但唔知一班尊貴嘅議員會唔會嫌用得電腦多，睇到對眼矇，最後索性偷懶唔睇文件呢？
卓妮