中環出更：旅業練絕技 楊章桂芝聽聲辨人
早前香港專業及資深行政人員協會（專資會）舉行十周年晚宴，一班專業人士齊聚。卓妮見到專資會理事楊章桂芝（Cindy）同港區婦聯秘書長區艷龍，兩人相識原來有段奇遇。話說兩人經常講電話，但係從未見過面，有次Cindy單憑把聲就認出佢，認真好耳力。
從事旅遊行業多年嘅Cindy話，當年冇網上買機票咁方便，大部分人出差前都要經旅行社訂機票，好多長期打電話幫襯嘅客人把聲，佢都聽到熟晒，區艷龍就係佢嘅熟客之一。不過兩人一直冇見過面，後來對方因工作轉變而少出差，因此好長時間冇聯絡。十幾年後，有次喺一個活動上，Cindy一聽到區艷龍把聲就認出係佢，仲講得出全名。區艷龍話，真係不得不讚Cindy記性特別好喎！
周伯展教女「冇得逼」
同場仲有專資會會長陳紹雄、創會會長容永祺、副會長周伯展同施榮懷等。正所謂虎父無犬女，本身係眼科醫生嘅周伯展兩名女兒都係專業人士，其中做大律師嘅大女周廷勵當日都有出席，細女就係事務律師。兩個女都咁叻，唔通周伯展有一套教女秘笈？佢就話冇，仲搬出「一命二運三風水四積陰德五讀書」，話讀書冇得逼喎！
卓妮又見到專資會理事楊素珊同容海恩，講起有女議員早排被發現有紋身，容海恩就話，其實依家好多人都有紋身，覺得此屬個人喜好，好似化妝一樣，自己覺得靚就冇乜問題。不過佢就冇諗過紋身，仲話連耳窿都冇釘喎！
卓妮