成日都話「善有善報，惡有惡報」，其實係有例外嘅，香港就係一個反常嘅地方，官老爺是非不分，黑白顛倒，餐餐搞出「善有惡報，惡有善報」嘅鬧劇，唔到你唔服。
有辦你睇，作惡多端嘅壹傳媒又被律政司放生嘞。係咁嘅，華人置業前主席劉鑾雄因為捲入澳門世紀巨貪案而被當地政府起訴，期間《蘋果日報》喺未經許可下刊登咗一份屬於大劉嘅醫療報告，涉嫌侵犯私隱，除咗大劉提出民事起訴，律政司亦票控四項違反《個人資料（私隱）條例》控罪。案件尋日續審，正當大家以為正義得以伸張之際，點不知控方以大劉身患重病不能出庭，本案冇合理定罪機會為由，一個屈尾十，決定撤控。咁即係點？即係冇事發生囉，即係放生囉。
喂！呢單畸士明明白紙黑字證據確鑿，爛果報涉嫌販賣名人私隱促銷牟利，即使證人無法出庭，一樣可以告到底o架，律政司咁都話冇合理定罪機會，即係欲脫之罪，何患無辭嘅啫。犯法唔使受罰，同變相鼓勵冇乜分別，市民嘅私隱仲有得剩嘅？以後仲有人挺身舉報罪行嘅？難為港府開口埋口重視個人私隱，原來得個噏字咋。
其實係人都知，唔係個個人涉嫌侵犯私隱都會獲放生o架，換作係其他被告咯喎，隨時被告到甩褲都得。但當被告係壹淫媒，咁就唔同講法嘞，無論觸犯嘅罪行幾嚴重都好，到最後都係大事化小，小事化了。淨係誹謗霸王單案咋，壹淫媒話就話罪名成立，但只係被判賠償三百萬元咁大把，即係霸王索償六億多元嘅二百分之一，請問公理何在？又好似大角咀冷血弒親碎屍案，壹淫媒喺案件進入司法程序後仍然刊出被告訪問，擺明藐視法庭，如果有法必依，監都有得坐，點知最後只係輕判罰款五十五萬元了事，有冇再荒謬啲吖？
仲有呀，壹淫媒多年來觸犯《淫褻及不雅物品管制條例》而被判罪成嘅個案厚過電話簿，幾時見過重罰吖，次次都係輕輕罰款幾千至幾萬元了事，唔怪得壹淫媒有恃無恐，少少罰款當係成本，愈淫賤愈快樂喇。政府內部係咪有無間道，港英餘孽係咪佢嘅保護傘，盲嘅都睇得出喇。
嗱，咪畀功夫茶睇死，壹淫媒老闆漢奸黎單黑金醜聞，以及佢老哥出錢出力搞佔領單畸士，查咗咁耐冇下文，最終都係不了了之嘅咋。所以話，香港所謂嘅法治精神根本係呃鬼食豆腐。
冇計嘞，港府係都要怕咗漢奸黎背後嘅外部勢力，投鼠忌器，壹淫媒仲唔橫行無忌咩。一句到尾，愛國愛港無前途，反中亂港有運行，香港愈搞愈亂又有乜出奇吖。