政情：公民講場：力撐傑志訓練中心 梁孔德：起碼用10年

早幾日又爆出政府向地區人士「摸底」，計劃收回沙田石門嘅傑志足球訓練中心，改建公共房屋，被各界鬧爆扼殺足運發展，雖然政府之後淆底，話搵到其他地方先會搬訓練中心，但未能平息怒火。足總主席梁孔德尋日接受電台節目訪問時都話全力撐傑志，唔明白點解剛落成僅一年嘅訓練中心要被收回，亦唔知道原來訓練中心要每年續租，因為佢認為中心應長期運作，年期起碼有十年，仲話本港目前只得一個足球訓練中心，政府唔能夠只係「起樓」，亦應保留社區設施。政府咪再扮聾耳陳，小心激起民憤呀！