政情：醫改「殺手」 怪醫獲邀復出

加入三方平台 再傾方案

怪醫尋日接受查詢時話接獲醫學會通知，希望佢加入平台，但由於自己唔喺香港，所以仍未知道詳情。怪醫以往喺立法會會議中經常缺席，被問到加入平台會唔會冇乜時間開會，佢就話時間總會有，相信呢個平台都唔會每個星期開會，加入後再睇吓運作係點先算，如果真係應付唔到，醫學會都可以安排其他代表。

對於有病人組織早前表明，如果怪醫加入平台，該組織就唔會加入。被問到覺得咁樣對佢係咪公平，佢就話由大家評論，認為應該對事不對人。至於各方就改革會唔會好難達成共識，佢就話好難講，指上次審議時，各持份者背後都有商討，亦有一啲初步共識，認為改善效率等較易達成共識嘅部分，可以先處理，樣樣都可以傾吓先，唔使咁緊張。

食物及衞生局回覆指出，三方平台由食衞局常任秘書長聶德權做召集人，成員來自醫學界、代表病人權益及消費者權益人士，以及立法會三個界別，每個界別各有六名代表，立法會大會選出主席後，當局會發信邀請立法會提名六名代表，確定所有成員名單後，會盡快召開首次會議。