政情：建制女將 勢封殺游BB
青年新政嘅立法會議員游蕙禎（游BB）近幾日講及香港土地問題，爆seed指港人「扑嘢（做愛）都搵唔到地方」，又話港人連去時鐘酒店做愛都要排隊，言論隨即惹起爭議，但佢不但冇後悔，仲話喺立法會內都會照講，呢件事甚至引起外國傳媒嘅關注，加以報道。部分建制派女議員對「扑嘢論」都好反感，梁美芬直指咁講係「粗鄙」同「猥瑣」，講嘢要按議事規則，唔好超越底線，民建聯葛珮帆（EQ）亦話議員講嘢要謹慎啲。睇嚟游BB日後如果真係喺立法會講呢啲，或會被封殺。
梁美芬教路「兩人單獨相處」
喺區議會同立法會選舉都被游BB追擊嘅梁美芬尋日首度開腔回應「扑嘢論」，話立法會係莊嚴嘅地方，公眾對議員嘅行為、操守、言論都有期望，咁樣講係「粗鄙」同「猥瑣」，仲話每個議員講嘢都反映佢嘅個人素養，議員一定要維持立法會嘅文明形象，佢仲講到明議員講嘢要按議事規則，唔好超越底線。
咁點樣演繹「扑嘢」兩個字先表達到當中嘅精粹呢？佢就話「一定有方法表達到」，又教路話講「兩個人單獨相處嘅時間」就比較文雅，仲話如果新議員喺議會講嘢「reach 到 bottom line」就唔係咁好喇！
除咗梁美芬之外，就連EQ都覺「扑嘢論」好唔妥當。話說EQ尋日會見特首後被記者問到點睇「扑嘢論」，佢即刻乸埋口面話「呢啲嘢好難講」，又大爆有街坊向佢投訴，話呢啲說話「有啲難聽」，仲擰晒頭咁話有好多家長本身都「唔贊同婚前性行為」，加上好多人都有宗教信仰，咁樣講會令人覺得「冒犯」。
嶺大讚何君堯 學生會反彈
不過有人彈，亦有人讚。嶺南大學喺上月電子通訊中，大讚四名勝出立法會選舉，包括校友游BB及李國麟、本科生羅冠聰同校董會成員何君堯係傑出嘅「嶺南人」，充分展現咗「嶺南人」素質，並體現「作育英才，服務社會」嘅校訓。當時游BB仲未講「扑嘢論」，唔知依家有冇改觀呢？
嶺南學生會就有好大反彈，尋日發聲明認為校方將何君堯與學生、教職員同校友相提並論，係有辱「嶺南人」嘅身份，又指何君堯獲委任成校董並冇民意基礎，缺乏學生認同，加上佢多次失言，有損嶺大校譽，所以絕不承認佢係嶺大群體一分子，並要求校方收回有關言論，以及向全體「嶺南人」道歉。