中環出更:封存時間囊錢大康鎅傷手

香港浸會大學歷史系為慶祝浸大六十周年校慶,尋日舉行咗百年時間囊封存典禮,由歷史系師生製作時間囊,存放喺浸會大學道校園入口廣場嘅草坪下。儀式進行期間出現咗小意外,出席典禮嘅浸大校長錢大康應邀上台時,為咗顯示親民嘅一面,諗住企上攝影師專用嘅梯級,點知唔小心喺梯級上跌落嚟,仲鎅傷手指添,好彩貼咗膠布後並無大礙。

一場虛驚之後,佢又再笑笑口企上梯級同大家揮手。致詞時仲話,唔明時間囊點解要封存一百年咁耐,係咪擔心如果只係存放六十年,屆時會唔想開啟,但係封存一百年就唔使顧忌放咗乜嘢?

百年疑惑 劉詠聰解畫

他又話,自己放咗記載浸大校史嘅歷史書及浸大六十周年紀念品入時間囊,冇寫低字條,因擔心百年之後啲人係咪仲讀中文喎!佢又話,如果要佢封存一個私人時間囊,作為IT人,佢一定會擺電子產品如iPhone等,睇吓未來嘅人知唔知道係乜嚟。

對於錢大康嘅疑惑,浸大歷史系系主任劉詠聰就解畫話,將時間囊封存一百年係因為「一百」有長久、美好及圓滿嘅意思,中國人有「百年基業」、「百世千秋」、「百子千孫」等,國際社會考試亦有以一百分為滿分咁話。至於浸大呢個時間囊唔止有浸大校舍嘅照片,仲有校內酒樓聯福樓嘅菜單。而劉詠聰自己就將多間商場嘅單張,自稱百年老店嘅傳單同店舖聲稱永久通用嘅贈券放入去,睇吓一百年後間百年老店係咪仲存在,永久通用贈券係咪仲有效喎!

卓妮

第一手消息請下載on.cc東網iPhone/iPad/Android/Windows Phone Apps