政情：今日你上鏡：大輝卸甲 日日公園捉棋

俗語有話「無官一身輕」，即將卸任嘅立法會議員林大輝日前出席潮屬各界社團酒會時話，依家成個人輕鬆晒，仲講笑話自己冇嘢做，日日去公園同阿伯捉棋，啲朋友見佢得閒，又成日約佢食飯，以前做議員就話多啲藉口推辭啫，依家就冇晒藉口，所以晚晚都出去食飯，搞到肥咗兩、三公斤，幾乎日日踢波都唔掂。大輝又話，啲朋友話佢終於做番自己，唔再好似以前講嘢咁唔謹慎。被問到點樣唔謹慎法？大輝就講笑話，以前做議員，同人食飯講句粗口都唔敢，怕被人錄低，影響議員形象喎。佢咁講，相信大家應該明白晒喇！