政情：本民前進軍立會公帑出糧
立法會仲有唔夠一個月就開鑼，唔少議員都積極籌組辦事處班底，以應付未來四年嘅議會工作。以本土民主前線（本民前）梁天琦「PlanB」成功進入議會嘅青年新政（青政）梁頌恆近日同人密密斟，據聞一眾本民前核心成員，同埋「港大幫」馮敬恩、王俊杰已答應幫忙，換言之，佢哋做咗議員助理之後，除咗用公帑出糧之外，仲可以名正言順進出立法會，但佢哋都係搞衝擊嘅常客，究竟入到立法會係搞事定做實事呢？大家要拭目以待嘞！
馮敬恩王俊杰同加入
據了解，青政候任議員梁頌恆同游蕙禎將會共同聘用一批辦事處職員，主要來自本民前同港大。佢哋初步討論過，本民前發言人黃台仰會做傳媒聯絡，策略性退出本民前後重新加入嘅李東昇會負責內務工作，至於梁天琦就負責「勾結外國勢力」，代表港獨人士參與外國研討會，呢個助理都算係與別不同。至於港大學生會前會長馮敬恩、港大學苑前總編王俊杰就分別負責撰寫發言稿等工作。
雖然看似分工清楚，但各人係咪可以恰如其分打好呢份工都係未知之數，好似黃台仰同梁天琦咁，都有官司纏身，隨時返返吓工就要去法庭，一旦法庭判佢哋入獄，辦事處就要另覓人才。
用人工養盟友當報恩
眾所周知，立法會係用公帑嘅，而有人話，其實青政係用份人工養住呢班人先，當係報番本民前選舉時大力幫忙之恩咁，至於做唔做到嘢其實都係其次，亦都有人分析，可以藉機會等青政同本民前增加合作機會，探討兩個組織合併可能。
不過，最令人擔心嘅係有人會利用議員助理之便搞事，好似社民連長毛梁國雄就曾有助理「玩升降機」阻礙議員返回議事廳，仲差啲搞到流會，已經令人側目，真係難以想像成班衝擊常客進入立法會之後，會唔會變本加厲，衝擊議事廳，到時就真係難以收科喇！