中環出更：卿撥秀髮 冧盡裙下臣

尋日着住透視薄紗上衣嘅卿姐，全程顯得非常高興。而當佢一入場就向大家派發工作報告，回顧自己多年來工作。佢話仲有五日任期仍會繼續衝刺，除咗出席唔同活動，仲會落區派工作報告，星期五會將喺沙田隆亨邨辦事處鎖匙交番畀房屋署，喺十月一日卸任就會即刻同小學同學去越南旅行。

採訪曾拉隊走人展霸氣

多個曾與卿姐共事嘅記者就爆料，有人話卿姐初入職做電視台記者時，有同事嫌佢個中文名老土，於是就用佢英文名「Emily Lau」嘅諧音，而幫佢改咗個花名叫「艾曼妞」，即係同七十年代一套非常著名嘅色情電影同名；亦都有人話，其實當年卿姐日日都着吊帶裙，仲鍾意邊聽電話邊撩動秀髮，對一班男同事嚟講真係不能磨滅嘅記憶。

另一傳媒高層又爆料，話卿姐做人真係四十年如一日，做記者嗰時就已經霸氣兼膽色過人，曾經約時任房屋司施恪專訪，點知後來拉隊走人，所以話，卿姐霸氣唔係一日練成。但講到最爆，都係卿姐做採訪主任時，有次想安排外勤同事去採訪突發新聞，當時全部人都蛇王無人應機，其中一個藉口竟然話自己尿急，要去廁所！點知，卿姐就叫個同事搵條橡筋解決，真係霸氣盡現！

今日 着透視薄紗上衣嘅卿姐，尋日向傳媒朋友道別。（互聯網圖片）	還有數天便正式告別議員生涯，一班黨友向卿姐送上「笑傲江湖」字畫。	喺九六年底，卿姐（箭嘴示）與十名民主派人士以躺臥會展中心外街道，抗議首屆特首由四百人推選委員會小圈子選出，因而被叫「瞓街卿」。

除咗事業，好多人都關心卿姐嘅感情關係。有人就大爆卿姐有個「密友」，成日同卿姐傳訊息，仲會好留意有關卿姐嘅新聞，卿姐即刻回應話，嗰個係佢小學同學，而且仲係女性，叫大家唔好誤會咁話。

卓妮