政情：公民講場：楊偉雄申撥不力「立」即摑佢一巴

港科院創院院長徐立之尋日接受電台節目訪問時話，特區政府投放喺科研嘅撥款，只佔GDP約百分之零點四，期望能提高至百分之一至二，佢舉例話深圳嘅科研撥款超過百分之四，內地一間大學嘅研究經費，可能多於全港大學總和，所以佢提議政府設立五百億元基金，以每年嘅收益投放喺本港科研。其實以前唔少大學校長都批評過政府發展科研嘅撥款太少，窒礙相關嘅發展，但政府一直做「聾耳陳」，依家就算成立咗創新及科技局之後，撥款額都仲係咁低，徐立之咁講就等如摑咗局長楊偉雄一巴。