政情：「偕」妻遊日 大晒龍蝦早餐
以前啲人晒命，就話魚翅漱口啫，估唔到即將退下火線嘅立法會議員單仲偕（騸雞）都晒埋一份。晒乜？龍蝦做早餐囉，真係晒得招搖。
上載社交網 羨煞旁人
騸雞前日喺社交網站facebook（fb）上載咗幾張相，相入面佢同老婆面前擺滿咗刺身，其中仲有碟龍蝦刺身，佢仲特登留言話「龍蝦做早餐」添！睇到呢啲相，佢朋友即刻喺fb留言話佢真有錢，亦有人話嗰度就係下次旅遊嘅地點，仲有人語帶相關咁話：「只有偕哥你最明白，嗰啲龍蝦夾硬來好乞人憎」。
原來騸雞兩公婆日前去咗日本旅行，呢張相就係佢哋身在九州宮崎市南面嘅一個叫日南嘅小鎮時影嘅。由於面對太平洋，龍蝦當造，所以早餐都擺龍蝦上枱。騸仲話shasimi（刺身）最好味，仲大讚龍蝦頭焗飯好香添！