中環出更：范國威趁「水尾」用立會大樓開會
新一屆立法會下月中旬開爐，退下火線嘅議員喺九月三十日前要「執包袱」走人。落選新界東議席嘅新民主同盟議員范國威（Gary）就趁「水尾」，尋日同黨友舉行檢討大會，佢指今次係新同盟今屆最後一次用立法會大樓內嘅設施開會，形容失去立法會嘅資源對新同盟影響好大，佢哋未來會繼續落區工作，希望下屆選舉可重奪議席。
未來集中地區深耕細作
新同盟尋日由早到晚進行馬拉松式會議，分析及檢討選舉過程；制訂組織日後策略等。Gary好感慨咁話新同盟失落唯一議席，明白今次會係交還辦公室前最後一次用立會資源開會，之後開會就要轉去區議員辦事處。佢又話依家最重要係有三個地區辦事處要交還，近十個職員需要遣散，佢正努力為職員「搵主好人家」。
講到之後有乜發展，佢強調會做好區議員工作，同時喺公開大學教書，佢深信深耕細作對於從政者仍然係好重要，未來會努力落區。
卓妮