中環出更：愛遊世界名人「善傳千里」
保良局尋日喺沙田馬場舉行百週年紀念盃賽，呢日仲有一啲保良局旗下嘅服務使用者包括青少年及康復人士出席，卓妮見主席郭羅桂珍都好支持佢哋，除咗好欣賞啲手作仔外，仲即場喺手背度整咗一個象徵幸運嘅henna圖案，佢話今次係佢第一次整henna，之前去旅行都見到但冇整，因為henna大概需要一至兩星期先會甩色，但為咗做慈善就冇所謂啦！
副主席馬清楠就有太太Mary同大女撐場，原來佢哋早前趁仔女開學前一家去咗秘魯旅行，馬清楠話佢哋每次去旅行都鍾意有啲運動元素，好似行山咁，今次佢哋就去咗馬丘比丘睇印加帝國嘅遺迹。
馬清楠同囝囝做「龍友」
馬清楠太太Mary亦非常熱愛旅行，佢話每次都會睇好多資料計劃行程，而且唔會跟團，事關佢認為世界咁大，想去多啲唔同地方，同一個地方好少去兩次，所以一去就要計劃到最好，而旅行團好多時總有一兩個行程唔啱自己心水，白白浪費咗寶貴嘅時間。佢哋一家去旅行仲有個好處，就係馬清楠同囝囝兩個都鍾意揹住相機周圍去，一定影到好多靚相。
同場仲見到總理鄧宣宏雁，原來佢都係趁早排暑假去完旅行返嚟，佢仲話學生開學亦係佢哋開工嘅時間，暑假旅遊旺季後本地人都返番嚟消費咁話。
嚟緊保良局亦會有星光熠熠耀保良等一連串慈善活動，呢日嘅保良局盃賽則以「善傳千里」為主題，籌得善款將用喺旗下安老、康復及青少年服務等，一班服務對象亦即場展示佢哋自己手藝同跳舞等。
卓妮