有高官口口聲聲話港人「住得其所，有瓦遮頭」係大道理，其他都係小道理。講就講得動聽嘞，實際上香港地好多公家地方唔係用嚟起屋，而係用嚟養蚊，你話係咪豈有此理！
第樣唔講，淨係講食環署轄下約一百個街市，空置率一直高企，加上管理甩甩漏漏，搞到財政年年見紅，直頭暴殄天物兼敗家。不過又奇怪喎，根據食環署早前向立法會提交嘅資料，截至去年年底，一萬五千個街市攤檔裏面，只有不足一成尚未租出。點解會咁？鬼咩，原來食環官僚為咗粉飾太平，不惜「造靚盤數」，所謂出租率係一回事，而實際營運率又係另一回事。有團體巡查四十個街市，發現其中營運率最低嘅十個平均只有三成四，所謂九成出租率，只係好睇唔好食。
好似西貢對面海街市咁吖，話就話出租率高達百分之百，但喺買餸高峰期間，成個街市三十幾檔居然無一營業，幾乎全部淪為私人貨倉，有人甚至用嚟擺放木材，有街市等於冇街市，有居民廿年來都係跨區買餸。至於另一重災區荃景圍街市亦唔好得幾多，實際營運率只有百分之五咁大把。最得人驚嘅係，有街市堆滿紙箱等易燃物，部分防煙門通道更加被雜物阻塞，一旦發生火警，後果不堪設想。
講開又講，食環署街市管理混亂，已經唔係今時今日嘅事，審計署同申訴專員公署不知炳過幾多鑊，其中申訴署今年更主動出擊調查現行街市制度，可惜食環官僚意見接受，態度照舊，情況一直冇改善不特止，家陣仲衰到文過飾非玩篤數，簡直離晒大譜！唔好忘記，街市無人問津，保養維修等費用一闊三大，同倒納稅人米冇乜分別。淨係上個財政年度之嘛，公眾街市就蝕超過三億元，小數怕長計，年年唔見幾億，多多公帑都唔夠嘥。
當然喇，公眾街市營運率超低，食環官僚辦事不力，固然難辭其咎，部分街市設備殘舊，追唔上時代需求，亦係不爭嘅事實。有頭髮冇人想做瘌痢，租戶一日都發唔到幾次市，用個檔口嚟擺貨都係迫不得已嘅啫。有人建議徹底改變部分公眾街市用途，包括興建文康設施，又或者興建住宅，點解當局唔考慮吓呢？
講到底，港府浪費土地資源，街市養蚊只係冰山一角，長期丟空嘅公務員宿舍以至賤價批出嘅私人會所土地，唔少位處黃金地段，港府與其生人霸死地，白白浪費會生金蛋嘅鵝，不如交番出嚟，賣畀私人發展商又得，用嚟興建公營房屋又得，咁咪唔使喊晒口呻「粒粒皆辛苦」囉！