特首梁振英日前的橫洲事件記招，可謂戲味十足，尤其臨結束時多謝公務員覓地辛苦，忽然「變調」，以哽咽之聲吐出：「我哋做出嚟嘅成績，粒粒皆辛苦。」儘管網上多抵死嘅惡搞，老朽卻聯想起蘇東坡一首七絕《花影》：重重疊疊上瑤台，幾度呼童掃不開。剛被太陽收拾去，卻教明月送將來。
東坡妙在整首詩全用形象思維，可是描繪具體，生動得來又見含蓄，完全符合ＣＹ當年話N年唔選特首，卻一個唔覺意「先易後難」砌低唐唐，幾經奮戰「迎難而上」，不怕風不怕雨，無懼「你呃人」就做咗香港最高領導人喇！
今次橫洲事件摸底摸出誠信破產，是否又會咁好彩逢凶化吉冇咁辛苦？老朽雖非如三國演義裏嘅諸葛亮凡事未卜先知，之不過憑常識及命理，一個人一次係咁幸運，第二次又係咁好彩，成日逢凶化吉，大步檻過，老天唔通都同佢有勾結？老朽唔多信囉！一個人無情情忽然有擔當有膊頭，現場明明有即時英語傳譯，ＣＹ仲要以英語重複之，如此忽然加強效果的「擔當」，使人想起內地最愛出風頭嘅「陳光標式行善」。真正行善積德，其實何須咁高調？西方之大富豪裸捐都唔使用到雙語廣播喇！
講真，ＣＹ忽然「字字皆哽咽」咁多謝公務員，佢哋都未必領情。有人話，橫洲事件係公務員唔妥梁特，若然唔係，有乜理由政府內部嘅保密文件，咁易畀爛果報攞到唱完一鑊又一鑊呢？擺明係認同「ＡＢＣ」，即阿貓阿狗當選都好過聽到狼嗥！ＣＹ今趟變調嘅多謝，「粒粒皆辛苦」也許枉費心機，白做了一場好戲矣！
人貴自知，明明係將大事「推比人」卻化身正義朋友一力擔當；之不過語言偽術試得多就唔靈，當一個人講乜都冇人信，係應該收聲嘅時候囉！古人說：見亂而不惕，所殘必多，其飾彌彰。ＣＹ正陷此困局而不知！