拔萃女書院（女拔）貴為傳統名校，每年收生都吸引大批家長去叩門。今年女拔會錄取五十八名外來學生，但就引來一千五百位家長出席簡介會，就知道乜嘢叫一席難求。正當家長絞盡腦汁爭崩頭之際，女拔校長劉靳麗娟竟然話，面試唔係考試，靠平時就得，唔需要特別預備喎！校長呢番說話真係講得輕鬆，如果面試唔計分，唔通學校咁得閒，只係同學生見吓面、認識吓？如果家長聽信佢呢番說話，到時失晒面試分就喊都無謂喇！
