政情：圖文教講「辛苦」德領館勁抽水

特首梁振英早前喺記者會中以「粒粒皆辛苦」形容政府搵地建樓嘅艱辛，畀唔少網民揶揄惡搞。經常都喺網上教德文嘅德國駐港總領事館今次亦唔放過抽水機會，尋日就喺佢哋嘅社交網站專頁上載圖片，以中英雙語教「辛苦」嘅德文「anstrengend」，仲提供埋例句「工作很辛苦」。不過最啜核嘅係背景幅圖係農田再加一雙疑似農民嘅手，「粒粒皆辛苦」嘅意思不言而喻。識睇梗係睇埋留言，有網民就話「眼淚水都抽光晒」，另外亦有唔少人問近期成為熱話嘅「摸底」，同「粒粒皆辛苦」德文係點講，唔知領事館會唔會順應民意提供答案呢？