政情：徐立之籲放眼中國趕科潮
相比起法律和醫學等熱門學系，本港STEM（即科學、技術、工程及數學）一向只係學生退而求其次嘅「水泡科」，皆因年輕人都知道讀完呢幾科前途「無亮」。不過，香港大學前校長兼港科院創辦人徐立之就認為年輕人嘅諗法錯晒，仲話讀工科都有得發圍。
徐立之尋日喺電台節目撰文，指本港年輕人鍾意最新嘅科技產品，但係對產品背後嘅技術就毫無興趣，原因係科研路途漫長，出路又唔多，佢又暗批年輕人無耐性、要「即食」嘅思想，令佢哋無勇氣投身創科之路。
徐立之話，以前想打電話就要由屋企跑到街口嘅士多借用，多得科技進步，依家人手一部手機，所以創新及科技係關乎成個社會嘅事，佢認為香港要加快步伐，鼓勵年輕人放眼中國，因為內地嘅科技實力已可上天下海，如果加埋香港完善嘅國際金融制度及大學教育，相信香港可以趕搭呢股浪潮前進喎！